Awiamodelizm muşdaklary ilkinji bahar ýaryşyny geçirdiler

Planerleriň radio arkaly dolandyrylýan görnüşleriniň ussatlarynyň arasynda Türkmenistanyň Kubogy ugrundaky ýaryşyň birinji tapgyry geçirildi. Kinniwanja elektrik hereketlendirijileriň kömegi bilen uçurylyp, soňra özi uçýan we bellenilen nokada gonýan elektouçarlaryň bäsleşigine aşgabatly tejribeli türgenler gatnaşdylar. Güýçli şemala garamazdan, olar ussatlygyň ýokary derjesini görkezdiler. 

Geçen ýylkysy ýaly, diňe bir türgenleriň öz eli bilen ýasan awiamodelleriniň däl, eýsem dünýä belli kompaniýalaryň önümleriniň hem gatnaşdyrylmagy ýaryşa höwesekleriň sanyny artdyrdy. Şonda-da Kubok ugrundaky ýaryşyň birinji tapgyrynda radio arkaly dolandyrylýan uçarçygyň nusgasyny öz eli bilen ýasan Gajy Toçkus ýeňiş gazandy. Ýaryşyň aýgytlaýjy tapgyrynda ol has tejribeli türgenlerden-de öňe saýlandy. Ikinji orny geçen ýyllardaky ýaryşlarda ençeme gezek ýeňiş gazanan sport ussady Sähet Kulyýew eýeledi. Sergeý Obrazsow üçünji orna düşdi. Ýurdumyzyň Kubogy ugrundaky ýaryşyň birinji tapgyrynyň ýeňijileri Türkmenistanyň Goranmak ministrliginiň Hormat hatlary bilen sylaglanyldy. Ýaryşyň ikinji tapgyry 13-nji maýda geçiriler.