TÜRKMENISTANLY TALYPLAR MALAÝZIÝANYŇ LIMKOKWING UNIWERSITETI TARAPYNDAN GEÇIRILEN HALKARA MEDENIÝET FESTIWALYNA GATNAŞDYLAR

2016-njy ýylyň 20-nji maýynda Malaýziýanyň LIMKOKWING uniwersitetiniň Merkezi meýdançasynda  dünýäniň 90-dan gowurak döwletiniň talyplarynyň gatnaşmagynda Halkara medeniýet festiwaly geçirildi.  Halkara medeniýet festiwalynyň dowamynda dürli reňdäki owadan milli eşiklerinde dünýäniň dürli döwletlerinden gelen talyplar öz ýurtlarynyň milli medeni esbaplarynyň, sungat eserleriniň sergisini geçirdiler we agşamky baýramçylyk konserdine gatnaşdylar.

Türkmenistanyň Malaýziýadaky (Kuala-Lumpur ş.) Ilçihanasynyň ýardam bermeginde Halkara medeniýet festiwalynda türkmenistanly talyplar özleriniň sergi-ýarmarkasyny Türkmenistanyň şanly Garaşsyzlygynyň 25 ýyllygyna we 2016-njy ýylyň “Mirasa sarpa goýmak, Watany özgertmek ýyly” diýilip yglan edilmegine bagyşladylar.

Türkmenistanly talyplar, sergi-ýarmarkasynda çärä gatnaşan 3000-den gowurak dürli milletleriň wekillerini, Malaýziýada akkreditirlenen diplomatik wekilhanalaryň ýolbaşçylaryny we olaryň wekillerini Türkmenistanyň baý medeni mirasy bilen tanyşdyrmak maksady öz sergi pawilýonyny türkmeniň milli däp-dessuryna laýyklykda guradylar we onuň içini, daşyny milli nagyşlar, şaý-sepleri, haly önümleri, Türkmenistan baradaky kitaplar we žurnallar bilen bezediler.

Türkmen talyplarynyň öz milliligi bilen tapawutlanýan sergi pawilýony hem-de olaryň Türkmenistanyň gadymdan gelýän däp-dessurlary, ýurtda Türkmenistanyň Milli Lideriniň ýolbaşçylygynda ylym-bilim, ykdysady, syýasy we medeni ugurlarda durmuşa geçirilýän özgerişlikler baradaky gürrüňleri çärä gatnaşyjylarda äýratyn gyzyklanma döretdi.

Malaýziýada soňky dört ýylyň dowamynda geçirilip gelýän bu çäre özüniň ýokary wekilçilikliligi bilen tapawutlanýandygy sebäpli bu çäräniň açylyş dabarasynda Malaýziýanyň Rekordlar kitabynyň wekili tarapyndan Malaýziýadaky ýokary okuw jaýlarynyň arasynda geçirilýän çäreleriň arasynda iň köp milletlli çäre hökmünde Limkokwing uniwersitetine degişli sertifikat gowşuryldy.